“A NOSTRA MONTAGNA”

Vagghiarda e ‘mpunenti, si tu na gran signura!
La forza e la putenza si tu di la natura

Macari c’a to uci atterrisci e fa paura
Non ci à statu omu ca di tia non s’innamura

Idda, si tu la sai vaddari ti lu sapi diri
Quannu cangia u tempu ti lu fa capiri

Montagna fatta ‘e focu e di sciari,
Ti cummogghi i nivi a ddu passi di lu mari

E pari ca idda dommi, e non succedi nenti,
Ma si si sbigghia, tremunu i pavimenti

Lu so pizzu si inchi di vampati
Quannu spara cinniri ‘nfucati

Trema la terra di li grandi botti.
Ca si sentunu di tutti li parti

“Scassau a montagna!!” “Scassau sta ‘ota!!”
Vaddati ddu gran fumu ca ‘ncelu si riota

Signura di la morti e di la vita
Distruggi all’omu lu fruttu da fatica

Cummògghi, furrìchi, suttérri, spasci, distruggi
Tuttu è persu sì!! Ma poi risorgi

Ma sta Signura ca merita rispettu,
Non è accussi tinta ppi comu quaccunu ha scrittu

Picchì idda, quannu i so bisogni à fari,
A’ datu sempri a tutti u tempu di scappari

Ma st’omu ‘ngignusu e ‘nsistenti,
Tuttu metti a dritta! Tempu u ‘nenti!

Na ‘ota peddi tu, na ‘ota iddu,
Non vinci mai nuddu!! U fattu è chiddu!!

Antica comu u munnu, sta lotta si ripeti
Picchì u piaceri ‘i st’omu è stari a li so peti.